بەپێی ڕاپۆرتی ئارازنیوز، ئەم هێرشە لەلایەن هێزەکانی کۆمەڵە ئەنجامدراوە و لە ئەنجامی پێکدادانەکەدا نزیکەی ١٠ ئەندامی سپای پاسداران کوژراون و چەند کەسێکی دیکەش بریندار بوون.
هەتا کاتی بڵاوکردنەوەی ئەم هەواڵە، هیچ یەک لە بەرپرسانی کۆماری ئیسلامی یان سپای پاسداران ئەم ڕاپۆرتەیان پشتڕاست نەکردووەتەوە و هێشتا ڕوونیان لەسەر وردەکارییەکانی ڕووداوەکە نەداوە. بۆیە، ئەم زانیارییانە بە شێوەی سەربەخۆ پشتڕاست نەکراونەتەوە.
ئەم ڕاپۆرتە لە کاتێکدا بڵاودەبێتەوە کە ئیسماعیل جەوادی، ئەندامی ئەنجومەنی ناوەندی ڕێکخراوی بەرگریی نەتەوەیی ئازەربایجان (دیرنیش)، پێشتر لە یادداشتێکدا هۆشداری لە زیادبوونی جوڵەی گرووپە چەکدارەکان لە ناوچەکانی حاجی عومەران، بەرزاییەکانی شەهیدان، کەلاشین و پێنجوێن دابوو.
ئەو ئاماژەی بە بارودۆخی ئاسایشی سنوورەکانی ڕۆژئاوای ئازەربایجان کردبوو و وتبووی ناوچەکە لە ڕۆژانی داهاتوودا ڕووبەڕووی «ڕووداوگەلێکی مەترسیدار» دەبێتەوە. هەروەها داوای لە خەڵک و چالاکوانانی بزووتنەوەی نەتەوەیی کردبوو بە وردی چاودێری گۆڕانکارییە سنوورییەکان بکەن.
