ئێران دەستوەردانی ئەمریکا لەم پرسە ناوخۆییەدا یەکسانە بە تێکچوونی تەواوی ناوچەکە و لەناوبردنی بەرژەوەندییەکانی ئەمریکا
لاریجانی بۆ دۆناڵد ترەمپ دەستوەردانی ئەمریکا ناوچەکە تێکدەدات
عەلی لاریجانی سکرتێری ئەنجومەنی باڵای ئاسایشی نیشتمانیی ئێران، لە وەڵامی هەڕەشەکانی دۆناڵد ترەمپدا ڕایگەیاند، هەڵوێستەکانی بەرپرسانی ئیسرائیل و ئەمریکا پشتی پەردەی ڕووداوەکانی ئێرانی ڕوون کردەوە
لاریجانی لە پەیامێکدا لە تۆڕی کۆمەڵایەتی ئێکس ئاماژەی بەوە کرد کە دەسەڵاتدارانی ئێران جیاوازی دەکەن لە نێوان داواکاریی کاسبکارانی ناڕازی و ئەو کەسانەی بە تێکدەر ناوی بردن
ئەو هۆشدارییەکی توندی ئاڕاستەی واشنتۆن کرد و نووسی ترەمپ با بزانێت دەستوەردانی ئەمریکا لەم پرسە ناوخۆییەدا یەکسانە بە تێکچوونی تەواوی ناوچەکە و لەناوبردنی بەرژەوەندییەکانی ئەمریکا
ئەم کاردانەوەیە دوای ئەوە هات کە دۆناڵد ترەمپ لە تۆڕی کۆمەڵایەتی ترووس سۆشیاڵ ڕایگەیاندبوو، ئەگەر کۆماری ئیسلامی ئێران بە توندوتیژی و تەقەکردن وەڵامی خۆپێشاندەران بداتەوە، ئەوا ئەمریکا بۆ یارمەتیدانی خەڵکی ئێران و ڕزگارکردنیان دەستوەردان دەکات و بۆ ئەو مەبەستە لە ئامادەباشی تەواودایە
هەروەها لاریجانی ڕوو لە گەلی ئەمریکا وتی پێویستە خەڵکی ئەمریکا بزانن کە ترەمپ دەستی بەم سەرکێشییە کردووە بۆیە با ئاگاداری سەربازەکانیان بن.
