جڤاتی نیشتمانی بزوتنەوەی گۆڕان متمانەی بەخشییەوە بە دانا ئەحمەد مەجید وەک رێکخەری گشتی بزووتنەوەکە، ناوبراویش رایگەیاند، بزوتنەوەى گۆڕان خۆی بۆ قۆناغى ئۆپۆزسیۆنی سیاسیی ئامادە دەکات.
دانا ئەحمەد مەجید، رێکخەری گشتی بزوتنەوەی گۆڕان ئاماژەی بەوەکرد:" شەڕو ئاڵۆزییەکانی ناوچەکە هەڕەشە لە عێراق و هەرێمی کوردستان دەکەن، هەربۆیە لەم بارودۆخە هەستیارەی ناوچەکە پێیدا تێدەپەڕێت، ئەرکی لایەنە سیاسییەکانی هەرێم و حکومەتی هەرێمە، بە ستراتیژێکی نیشتیمانی مامەڵە لەگەڵ پەرەسەندنەکانی ئەم دۆخەکە بکەین ".
هەروەها راشیگەیاند:" پێویستە لەپێناو بەرژەوەندى گشتى هاوڵاتیان و میللەتەکەمان خۆمان و هەرێمى کوردستان لەو ململانێ و ئاڵۆزیانەدا بپارێزین و هاوسەنگی سیاسیی ڕابگرین".
لەبارەى پرۆسەى هەڵبژاردنیش، رێکخەری گشتی بزوتنەوەکە داوای لەسەرجەم ئۆرگان و یەکە رێکخراوەکانى گۆڕان کرد، بە پەرۆش و بە گڕوتینەوە بەشدارى بانگەشەى هەڵبژاردن بکەن لە هەر چوار بازنەی هەولێر و سلێمانی و دهۆک و هەڵەبجە.
