با ئێمەش ساتێک بینەری ئەو دراما تراژیدیە بێن چونکە بۆ هەر گۆڕانکاریەک کورد باجی خۆی داوە
با ئێمەش ساتێک بینەری ئەو دراما تراژیدیە بێن چونکە بۆ هەر گۆڕانکاریەک کورد باجی خۆی داوە
کۆتاییی تەمەنی ستەم؛ کاتێک کورد دەبێتە دەرهێنەری مێژوو نەک تەنها بینەر!
کۆمەڵانی خەڵکی کوردستان!
نەوەی قوربانی و خۆڕاگری!
ئەمڕۆ ئێران لە ناو جەرگەی درامایەکی تراژیدیدا دەژی؛ درامایەک کە ئەکتەرە سەرەکییەکانی، ئەو دەسەڵاتە ئاخوندییەیە کە چوار دەیە تەنها "مەرگ" و "تاریکی" و "پەتکردنی سێدارە"ی بەرهەم هێناوە.
ئەمڕۆ شەقامەکانی ئێران لە ژێر پێی ستەملێکراواندا دەکوڵێن، ئەو دیوارانەی بە ناوی پیرۆزییەوە بۆ چەوساندنەوە بونیاد نرابوون، خەریکە بەسەر دەسەڵات دارانیدا دەڕووخێن. نادادپەروەری گەیشتووەتە لووتکە و "ئاخوندیزم" لە بەردەم دادگای مێژوودا دوایین هەناسەکانی خۆی دەدات.
گەلی تێکۆشەری کورد!
ئێمە لە "بزووتنەوەی ئایندە" دەڵێین: با کورد ساتێک بە وردی و بە دیدێکی فراوانەوە بینەری ئەم دراما تراژیدییە بێت. ئەوەی ئەمڕۆ لە تاران و شارەکانی تری ئێران دەگوزەرێت، ئەو زریانەیە کە کورد دەیان ساڵە پێشبینی دەکات. بەڵام جیاوازییەکە لێرەدایە؛ کورد "تەماشاکارێکی بێدەنگ" نییە، بەڵکو ئەو لایەنەیە کە لە هەمووان زیاتر "باجی خۆی داوە" و قوربانی داوە بۆ ئەو گۆڕنکاریە .
کورد تەنها لەم ساڵانەی دواییدا ڕانەپەڕیوە، بەڵکو چوار دەیەیە لەناو "زەریایەکی خوێندا" مەلە دەکات بۆ گەیشتن بە کەناری ئازادی. ئێمە ئەو نەتەوەیەین کە پێش هەمووان گوتمان "نا" بۆ دیکتاتۆرییەت. ئێمە ئەو نەتەوەیەین کە ڕۆڵەکانمان لەسەر سێدارەکاندا سروودی ئازادییان دەخوێند، کاتێک زۆرینەی ئەوانەی ئێستا لە شەقامەکاندان، لە ژێر سێبەری ئەو
دەسەڵاتەدا مانیان گرتبوو.
بۆیە پەیامی ئێمە بۆ ئەم قۆناغە ڕوونە:
کورد باجی گۆڕانکاری داوە: هیچ لایەن و هێزێکی سیاسی لە ئێراندا بۆی نییە منەت بەسەر کورددا بکات. کورد پێشوەختە شەرعییەتی گۆڕانکاری بە خوێنی شەهیدانی و بە فرمێسکی دایکانی سەلماندووە. ئێمە لە هەر گۆڕانکارییەکدا، "سەلمێنەربووین "
وریایی لە درامای دەسەڵات: ئەم ڕژێمە لە کاتی نوقمبووندا دەست بۆ هەموو شتێک دەبات. کورد نابێت ببێتە سووتەمەنی بۆ شەڕێک کە مافە نەتەوەییەکانی تێدا دەستەبەر نەبێت. ئێمە پشتیوانی لە ڕووخانی ستەم دەکەین، بەڵام بە مەرجێک "ستەمێکی تر" لەژێر پەردەی جیاوازدا جێگەی نەگرێتەوە.
. یەکڕیزی، تاکە چەکی ئێمەیە: داوا لە سەرجەم هێزە سیاسییەکانی کوردستان دەکەین، لەم ساتە هەستیارەدا کێبڕکێی حیزبی وەلابنێن. مێژوو تەنها ڕێز لەو نەتەوانە دەگرێت کە لە کاتی داڕمانی ئیمپراتۆرییەتەکاندا، خاوەن "قەوارە و گوتارێکی یەکگرتوون".
گۆڕانکاری ڕیشەیی نەک جوانکاری: ئێمە تەنها داوای گۆڕینی کەسەکان ناکەین، بەڵکو داوای گۆڕینی "سیستەمی فیکری و سیاسی" دەکەین. دەبێت ئێرانی داهاتوو لەسەر بنەمای داننان بە شوناسی نەتەوەیی کورد و مافی بڕیاردانی چارەنووس بونیاد بنرێت، ئەگەر نا، ئەم دراما تراژیدییە بۆ گەلانی تریش دووبارە دەبێتەوە.
هاونیشتمانیانی ئازیز!
با تەماشای شەپۆلەکانی شەقام بکەین، بەڵام با ئامادەی هەموو بارودۆخێکی پێشبینی کراو بین . کورد نابێت جارێکی تر ببێتە "قوربانی ، با ئەم جارە شەپۆلەکە لەو جەمسەرەوە دست پێبکات و لە کوردستاندا جێگیر بێت.
ئێمە وەک بزووتنەوەی ئایندە، بڕوامان بەو هێزە هەیە کە لە ناو جەرگەی زوڵمدا لەدایک دەبێت. کاتی ئەوە هاتووە کە کورد پشکی خۆی لە مێژوو وەربگرێتەوە، چونکە هیچ نەتەوەیەک بەقەد کورد نرخی گرانبەهای بۆ "ئازادی" نەداوە. هە بۆیە لە یێستادا بینەری ئەو دراما ترژیدیەن بە کوێ دەگات .
ناوەندی بڕیار
بزووتنەوەی ئایندەی کوردستان
