له کاتێکدا ڕژێمی ئێران ڕاستهوخۆ هاوپشتی ڕووسیا دهکات له جهنگی ئوکڕانیا، فەرماندەی هێزی ئاسمانیی سوپای پاسداران ئاشکرای کرد، موشەکێکی نوێیان دروست کردووە کە دەتوانێت سیستمە دژە موشەکییەکان ببڕێت و بیانکاتە ئامانج، تاوەکو دەیان ساڵی دیکەیش تەکنۆلۆژیایەک نابێت کە بتوانێت بەرەنگاری ببێتەوە.
ئەمڕۆ پێنجشەممە ئەمیرعەلی حاجیزادە، فەرماندەی هێزی ئاسمانیی سوپای پاسداران بە رۆژنامەنووسانی راگەیاند، موشەکێکی بالیستیکی هایپەرسۆنیکی پێشکەوتوو یان دروستکردووە کە خێراییەکی زۆری هەیە.
ئەمیرعەلی حاجیزادە دەڵێت، ئەو مووشەکە سیستمە دژە موشەکییەکانی دوژمن دەکاتە ئامانج و لە بواری مووشەکدا پێشکەوتنێکی گەورەیە.
موشەکی هایپەرسۆنیک دەتوانێت لانیکەم پێنج هێندە خێراتر لە دەنگ و بە رێڕەوی ئاڵۆزدا بڕوات و ئەمەش وادەکات دەستنیشانکردن و بەرەنگاربوونەوەیان زۆر قورس بێت.
لەگەڵ ئەوەشدا هیچ زانیارییەک نییە کەوا ئێران ئەم جۆرە مووشەکەی تاقیکردبێتەوە. کۆماری ئیسلامیی ئێران لەم ساڵانەدا بۆ رووبەڕووبوونەوە لەگەڵ گەمارۆ و سزاکان، پیشەسازیی ناوخۆیی بەرهەمهێنانی مووشەکی پەرەپێداوە.
هاوکات، بەرنامەی مووشەکە بالیستیکەکانی ئێران بووەتە هۆی نیگەرانیی وڵاتانی ناوچەش، بەڵام کۆماری ئیسلامیی ئێران دەڵێت، بەرهەمهێنان و پەرەپێدانی مووشەکەکانی، بۆ بەرگرییە.
