ئاژانسی هەواڵی ڕۆیتەرز ڕۆژی چوارشەممە ٥ی خەرمانان بە پشت بەستن بە سەرچاوە ئاگادارەکان ڕایگەیاند کە سێ وڵاتی ئەورووپی – بەریتانیا، فەرەنسا و ئەڵمانیا – ڕەنگە ڕۆژی پێنجشەممە ڕەوەندی گەڕاندنەوەی سزاکانی نەتەوە یەکگرتووەکان دژی کۆماری ئیسلامیی ئێران دەست پێ بکەن.
چوار دیپلۆماتی ئورووپایی بە ڕۆیتەرزیان ڕاگەیاندووە، ئەو وڵاتانە كە ناوی E3 دەناسرێن، دوای دیدار لەگەڵ نوێنەرانی ڕێژیمی ئێران ڕۆژی سێشەممە، بەو ئەنجامە گەیشتن کە تاران هیچ بەڵێنێکی کۆنکرێتی و جیددی سەبارەت بە بەرنامە ئەتۆمییەکەی نەداوە. بەڵام لەگەڵ ئەوەشدا ئەوروپییەکان هیوادارن لەماوەی ٣٠ ڕۆژی داهاتوودا ئێران بەڵێنێک بدات کە ڕەنگە جێبەجێکردنی ڕێوشوێنە سزاییەکان دوابخات.
بەگوێرەی ڕاپۆرتەکە، بڕیاری سەرەتایی ئەورووپا دەستپێكردنی ڕەوەندی چالاككردنی "میکانیزمی ماشە" لە ڕۆژی پێنجشەمەوەیە، هەوڵێك كە بەشێوەیەکی ئۆتۆماتیکی دەبێتە هۆی گەڕانەوەی سزاکانی نەتەوە یەکگرتووەکان.
هەواڵی ڕۆیتەرز جارێکی دیکە نیشانی دا کە کۆماری ئیسلامی لە مەیدانی نێودەوڵەتیدا بە بونبەست گەیشتووە. حکوومەتێك کە ساڵانێکە لە ژێر دروشمی "هێزی ئەتۆمی" سامانی نیشتمانی خەرجی سیناریۆكانی كردووە و ئێستا لە لێواری گەڕانەوەی سزاكاندایە.
