پرۆسەی دەنگدان لە تورکیا کۆتایی هات

پرۆسەی دەنگدان لە تورکیا کۆتایی هات

دوای ئەوەی لە کاتژمێر 8:00ی بەیانی ئەمڕۆ یەکشەممەوە ناوەندەکانی دەنگدان بەڕوی دەنگدەران بۆ هەڵبژاردنی سەرۆک کۆمار وپەرلەمانی تورکیا کرایەوە، کەمێک لەمەوبەر و لەکاتژمێر 5:00 پرۆسەکە کۆتاییهات و دەرگای ناوەندەکانی دەنگدان داخران.

کاتژمێر 8:00ی بەیانی ئەمڕۆ یەکشەممە سندوقەکانی دەنگدان بۆ هەڵبژاردنی سەرۆک کۆمار و پەرلەمانی تورکیا لە باکوری کوردستان وتورکیا دەستیپێکرد، کە 60 ملیۆن و 297 هەزار و 834 دەنگدەر کە تەمەنیان لە سەرو 18 ساڵەوەیە مافی بەشداریکردنیان لە پڕۆسەیدەنگداندا هەبو.

بەپێی ریزبەندی پسوڵەی دەنگدان لە هەڵبژاردنەکاندا، رەجەب تەیب ئەردۆگان، موحەڕەم ئینجە، کەمال کڵچدارئۆغڵو و سینان ئۆغان وەککاندید بۆ پۆستی سەرۆک کۆمار کێبڕکێ دەکەن بۆ بەدەستهێنانی پۆستی سەرۆک کۆمار، سەرەڕای کشانەوەی موحەڕەم ئینجە لەکێبڕکێکە بەهۆی چاپکردن و دابەشکردنی کارتەکان، ناوی هەر لەسەر کارتەکان دەمێنێتەوە.

لە هەڵبژاردنی پەرلەماندا کە 28هەمین خولی پەرلەمانی تورکیایە 24 پارت و 151 کاندیدی سەربەخۆ لەسەرانسەری تورکیادا بەشداربون،پارتەکان بە پێنج هاوپەیمانی جیا کە بریتیین لە هاوپەیمانانی "جمهور، میللەت، ئاتا، کار و ئازادی و یەکێتیی هێزی سۆسیالیست" بەشداری لە هەڵبژاردنەکاندا دەکەن.

هەریەک لە ئاکپارتی، مەهەپە، بەبەپە و پارتی یەنیدەن رەفاهـ بە ناوی "هاوپەیمانی جمهور" بەشداری لە هەڵبژاردنەکاندا دەکەن، هەریەک لەجەهەپە، ئیی پارتی، پارتی سەعادەت، پارتی ئایندە، پارتی دیموکراسیی و پارتی دیموکراسیی و پێشکەوتن و پارتی دیموکرات لە"هاوپەیمانی میللەت"-دا کۆبونەتەوە.

هەروەها پارتی سەوز و ئایندەی چەپ (پارتی سەوزی چەپ) و پارتی کرێکارانی تورکیا (تیپ) لەژێر ناوی "هاوپەیمانی کار و ئازادی" بەشداری لە هەڵبژاردنەکاندا دەکەن، پارتی دیموکراتی گەلان (هەدەپە)ش کە دۆسیەی داخستنی لە دادگای دەستوریی تورکیا درێژەی هەیەلە لیستی "پارتی سەوزی چەپ"دا بەشدارە.

چاوەڕواندەکرێت لەکاتژمێر 11:00ی ئەمشەو ئەنجامی بەرایی هەردو هەڵبژاردنی سەرۆکایەتی تورکیا و پەرلەمانی ئەو وڵاتە رابگەیەندرێت،دوای بەدواداچونیش بۆ تانە و سکاڵاکان کۆمسیۆنی هەڵبژاردنی ئەو وڵاتە بەفەرمی ئەنجامەکان رادەگەیەنێت.