ئەختەر ئەحمەد، دایکی دکتۆر کازم فارووق، پەرلەمانتاری کوردستان، لە کۆنفرانسێکی ڕۆژنامەوانیدا، چەند زانیارییەکی سەبارەت بە نەخۆشکەوتنی کوڕەکەی خستە ڕوو و ئاشکرای کرد کە لە دەرەوەی وڵات پشکنینیان کردووە و پێیان راگەیاندوون کە دکتۆر کازم ژەهرخوارد کراوە.
دکتۆر کازم فارووق، ئه‌‌‌ندام په‌‌‌رله‌‌‌مان له نه‌‌‌وه‌‌‌ی نوێ، که شاسوار عبدالواحید سه‌‌‌رۆکیه‌‌‌تی، ئاماژه به‌‌‌وه ده‌‌‌کرێ ئه‌‌‌و ئه‌‌‌ندام په‌‌‌رله‌‌‌مانه ژه‌‌‌هراوی کرابێ.
ئەختەر ئەحمەد دایکی دکتۆر کازم رای گەیاند: دکتۆر کازم تووشی نەخۆشییەکی قورس بووە و ئەوانەی لە کوڕەکەم نزیک بوون لە کاتی نەخۆشییەکەدا پشتیان لە دکتۆر کازم کردووە و تەنانەت هەندێکجار بە قسەی ناخۆش دڵی ئێمەیان ئازار دەدا، نەخۆشییەکەی دکتۆر کازم لە مانگی یەکی ئەمساڵ سەرەتاکەی دەرکەوت دواتر نەخۆشییەکەی زیاتر تەشەنەی کرد و تا کار گەیشتە ئەوەی تووشی خوێنبەربوون بوو، بێگومان ئێمە لە مانگی دوو ڕەوانەی نەخۆشخانەی شارمان کرد لە شاری سلێمانی، پزیشکەکان لێمان کۆبوونەوە و گوتیان، نەخۆشییەکەی زۆر قوورسە چی خواردووە? ئێمە ناتوانین چارەسەری پزیشکی بۆ بکەین تاوەکوو نووسراوی پۆلیس نەگات بەدەستمان.
ئاشکراشی کرد: پزیشکەکان دەیانزانی شتێکی هەستیار چووەتە گەدەی دکتۆر کازمەوە دوو جار لە نەخۆشخانەی(شار) نازووڕیان بۆ کرد، بەڵام بۆیان دەرکەوت سورێنچکی و گەدەی هەمووی برینە و خوێنی لێ دەتکێت، بەڵام پزیشکەکان نەیان دەوێرا خۆیان چارەسەری پزیشکیی بۆبکەن، دەیانگوت، پزیشکێکی دیکە هەیە دەبێ چاوەڕێ بکەین ئەو نازووڕێکی تایبەتی بۆ بکات.
ئەختەر ئەحمەد گوتیشی: پزیشەکەکانی سلێمانی پیان گوتین، بە زووترین کات دکتۆر کازم ڕەوانەی دەرەوەی وڵات بکەن، لە دەرەوەی وڵات پزیشکەکان پێیان گوتین، کوڕەکەتان ژەهرخوارد کراوە و هەوڵ دەدەین چارەسەری بکەین.
دایکی دکتۆر کازم، ئاماژەی بە ئەوەش دا: ئەو کاتەی دکتۆر کازم، تووشی ئەو نەخۆشییە قورسە بویەوە پرسیارمان لەچەند هاوڕێکی نزیکی کرد لەنێو نەوەی نوێ، پێمان گوتن، دکتۆر کازم لە ئێوە نزیک بووە چی خواردووە? بۆچی ئاوای بەسەرهاتووە? بەڵام ئەو چەند کەسە لەنێو خۆیاندا شڵەژان و گوتیان، دکتۆر کازم ، کەی لەلای ئێمە ماوە? ساڵ و نیوێکە لای ئێمە نەماوە، بەڵام لەو کاتەوە هاوڕێکانی دکتۆر کازم لەنێو نەوەی نوێ شتی خراپ لەسەر کوڕەکەم بڵاو دەکەنەوە و دەڵێن دکتۆر کازم نەخۆش نییە و چووە بۆ دەرەوەی وڵات بۆ پیاسە، بەڵام هیوادارین تەندروستیی کوڕەکەم باش بێت و بگەڕێتەوە، بەڵام ئەگەر خوانەخواستە موقەدەرێک بقەومێت، ئەوەی گومانم لێیەتی چاوی بە دەڕنافیس دەردەهێنم، بەسەریدا تێناپەڕێت.
دایکی دکتۆر کازم، لە وەڵامی شاسوار عەبدولواحید و بەرپرسانی نەوەی نوێ کە داوای ناونیشانی ئێستای دکتۆر کازم و ئەو نەخۆشخانەیەی لێی خەوێندراوە دەکەن لە کۆنفڕانسە رۆژنامەوانییەکەدا گوتی: دۆست و دوژمنمان لێ تێکەڵ بووە و ناونیشان نادەین بە کەس ئەوانەی داوای ناونیشانی ئێستای دکتۆر کازم دەکەن، ئەگەر راست دەکەن و خەمخۆر بوون، با کە دکتۆر کازم لە نەخۆشخانەکانی سلێمانی بوو، سۆراغیان بکردبایە و بۆ چارەسەر بیانبردبا بۆ دەرەوەی وڵات.
