مەزڵووم عەبدی بەکارهێنانی زمانی شەڕ قبووڵکراو نییە
مەزڵووم عەبدی بەکارهێنانی زمانی شەڕ قبووڵکراو نییە
و حەلەب ڕووبەڕووی گۆڕینی دیموگرافی بووەتەوە
مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) ڕایگەیاند کە پەنابردنە بەر زمانی شەڕ بۆ سەپاندنی چارەسەری تاکلایەنە بە هیچ جۆرێک قبووڵکراو نییە و ئەوەی لە حەلەب ڕوودەدات زەوینەسازییە بۆ "گۆڕینی دیموگرافیی مەترسیدار."
فەرماندەی گشتیی هەسەدە ئاماژەی بەوە کرد کە بەردەوامبوون لەسەر ڕێگەی جەنگ شتێکی بێ ئەنجامە و وەبیرهێنایەوە کە ئەم شێوازە پێشتریش لە کەناراوەکانی سووریا و سوەیدا تەنیا بووەتە هۆی دروستبوونی کۆمەڵکوژی.
عەبدی بە توندی دیمەشقی تۆمەتبار کرد بەوەی کە لە کاتی بەڕێوەچوونی پرۆسەی دانوستان و گفتوگۆکاندا، تانک و تۆپخانەی لە گەڕەکەکانی حەلەب بڵاوکردووەتەوە و هێرشی کردووەتە سەر سڤیلە بێچەکەکان.
بە گوتەی فەرماندەی هەسەدە، بۆردوومانکردنی هاووڵاتییان و هەوڵدان بۆ هەڵکوتانە سەر گەڕەکە کوردییەکان لەم کاتە هەستیارەدا، هەموو دەرفەتەکانی گەیشتن بە لێکتێگەیشتنی سیاسی لەنێودەبات.
مەزڵووم عەبدی هۆشداریی دا کە گەمارۆدانی گەڕەکەکانی شێخ مەقسوود و ئەشرەفییە، مەترسیی کۆمەڵکوژی بۆ سەر دانیشتووانەکەی دروست کردووە و ئامانج لێی گۆڕینی پێکهاتەی دیموگرافیی ناوچەکەیە.
لە کۆتایی پەیامەکەیدا جەختی کردەوە کە هەسەدە لە تەنیشت خەڵکی خۆڕاگری ئەو دوو گەڕەکە دەوەستێت و چەند ڕۆژێکە لەگەڵ هەموو لایەنە پەیوەندیدارەکان لە پەیوەندیدان بۆ ئەوەی ڕێگری لە بەردەوامیی ئەم هێرشانە بگرن.
