تەقینەوەی مین لە دیواندەرە؛ چوار منداڵ بریندار بوون، دوو منداڵ باری تەندروستییان ناجێگیرە.
پاشنیوەڕۆی ڕۆژی هەینی ٧ی خەرمانانی ١٤٠٤، تەقینەوەی مینی چێندراو لە شەقامی ١٦ مەتری شاری دیواندەرە بووە هۆی برینداربوونی چوار منداڵ بە ناوەکانی سامی و مانی جەلالی، کیانوش و موبین خوسرەوی.
بەپێی ڕاپۆرتی هانا، دۆخی دوو لەو منداڵانە کە لە نەخۆشخانەی خومەینیی دیواندەرە خەوێندراون، ناجێگیرە.
کۆماری ئیسلامیی ئێران هێشتا نەچووەتە پاڵ کۆنوانسیۆنی ئۆتاوا (پەیماننامەی قەدەغەکردنی بەکارهێنان، کۆکردنەوە، بەرهەمهێنان و گواستنەوەی مینەکانی دژە مرۆیی). ئەم ڕێککەوتنە لە ساڵی ١٩٩٩ کەوتە بواری جێبەجێکردنەوە و تا ئێستا ١٦٥ وڵات پەیوەندییان پێوە کردووە.
بەڵام ڕێژیمی ئێران نەک هەر نەچووەتە پاڵ ئەم کۆنوانسیۆنە، بەڵکوو دەوترێت کە لە هەندێک ناوچەی سنووری بە تایبەت لە پارێزگاکانی ڕۆژئاوا لەوان کوردستان و ئیلام مینی نوێی چاندووە.
بە پێی ئاماری هانا، تەنیا لە ساڵی ٢٠٢٤دا، لانیکەم ١٠ کەس بە هۆی تەقینەوەی مین لە ناوچە سنوورییەکانی ڕۆژئاوای ئێران کوژراون یان بریندار بوون. هەروەها لە سەرەتای ساڵی ٢٠٢٥ەوە تا ئێستا ٨ کەسی دیکە بەهۆی تەقینەوەی مینی چێندراوەوە بوونەتە قوربانی.
