کەیهان مەقسوودی، هاووڵاتیی بەهایی لە ورمێ دوای دەست بەسەرکردنی چارەنووسی روون نییە.
ڕاپۆرتەکان ئاماژە بەوە دەکەن کە کەیهان مەقسوودی، فۆتۆگرافەری تەمەن ٤٩ ساڵ و هاووڵاتیی بەهایی دانیشتووی شاری ورمێ، زیاتر لە دوو مانگە لە دەستبەسەرگەی ئیتلاعاتدا لە دۆخێکی نادیاردا ڕاگیراوە.
مەقسوودی کە ڕۆژی ٣٠ی پووشپەڕی ١٤٠٤ لە شوێنی کارەکەی دەستبەسەر کرابوو، تا ئێستا ٦٩ ڕۆژ لە دەستبەسەریدا بووە. سەرەتا دوای لێپرسینەوەیەکی دوورودرێژ بۆ زیندانی ورمێ گوازرایەوە، بەڵام چەند ڕۆژ لەمەوبەر بەبێ ڕاگەیاندنی هیچ هۆکارێکی دیاریکراو، بۆ دەستبەسەرگەی ئەمنیەتی گەڕێندرایەوە.
بەپێی زانیارییەکان، ئەم هاووڵاتییە بەهایییە لە ماوەی دەستبەسەرکردنیدا لە مافە سەرەتاییەکان، لەوانە دەستڕاگەیشتن بە پارێزەر بێبەش بووە.
تا ئێستا هیچ زانیارییەکی ورد لەبارەی هۆکاری دەستبەسەر كردن و ئەو تۆمەتانەی کە ئاراستەی ناوبراو کراوە، لەبەردەستدا نییە.
