ڕێکخراوی لێبوردنی نێودەوڵەتی بەیاننامەیەکی بڵاوکردەوە و ڕایگەیاند، پێویستە دەستبەجێ دەسەڵاتدارانی کۆماری ئیسلامی بەرنامەكانی لەسێدارەدانی چوار زیندانیی سیاسیی کورد و دەستبەسەرکراوی بزووتنەوەی شۆڕشگێڕیی "ژن، ژیان، ئازادی" بە ناوەکانی "ڕزگار بەیگزادە بابامیری، عەلی (سۆران) قاسمی، پێژمان سوڵتانی و کاوە ساڵحی ڕابگرن.
ئەم ڕێکخراوی مافی مرۆڤە جەختی لەوە کردەوە کە ئەو کەسانە دوای دادگاییکردنێکی نادادپەروەرانە بە تۆمەتی پەیوەندیدار بە ئاسایشی نەتەوەیی و دوابەدوای ناڕەزایەتییەکانی "ژن، ژیان، ئازادی" سزای لەسێدارەدانیان بەسەردا سەپێندرا. دادگاییکردنەکەیان تەنها لە ماوەی سێ دانیشتنی دە خولەکیدا بەڕێوەچوو و تۆمەتباران ماوەی چەند مانگێکە بەبێ ئەوەی دەستیان بە پارێزەر بگات، دەستبەسەر کراون.
ڕێکخراوی لێبوردنی نێودەوڵەتی ڕایگەیاند کە دادگا بۆ دەركردنی سزای لەسێدارەدان، پشتی بە "دانپێدانانی زۆرەملێ"ی ئەو کەسانە بەستووە، کە لە ژێر ئەشکەنجەدا بەدەستیان هێناوە و دواتر لە میدیای دەوڵەتی پەخشکراون. بەپێی ڕاپۆرتی ئەو ڕێکخراوە، ڕزگار بەیگزادە بابامیری لە نامەیەکی کراوەدا لە زیندانەوە باسی لەوە کردووە کە ڕووبەڕووی جۆرەها ئەشکەنجەی وەك، خنکانی دەستکرد، لەسێدارەدانی ساختە، خەفەكردن، بێخەوی و شۆكی کارەبا بۆ بەشە جیاوازەکانی جەستەی.
