ئیلهام نادری مونفەرێد بە تۆمەتی چالاکی تەبلیغی بۆ ئیسرائیل سزای دوو ساڵ بەندکرانی بەسەردا سەپێندرا.
ئیلهام نادری مونفەرێد، هاووڵاتیی کورد و خەڵکی شاری نۆدشەی سەر بە پارێزگای کرماشان و دانیشتووی مەریوان، لە لایەن دەزگای دادوەریی کۆماری ئیسلامیی ئێرانەوە سزای دوو ساڵ بەندکرانی بەسەردا سەپێندرا.
بە پێی ڕاپۆرتی هەنگاو، لەم دواییانەدا ئیلهام نادری مونفەرێد، تەمەن ۳۲ ساڵ و خەڵکی نۆدشە لە لایەن دادگای شۆڕشی مەریوان بە تۆمەتی «چالاکیی تەبلیغی بە قازانجی ئیسرائیل» سزای دوو ساڵ بەندکرانی بەسەردا سەپێندرا.
بە وتەی سەرچاوەیەکی ئاگادار، ماوەی بیست و یەک مانگ و نیو لەو سزایە هەڵپەسێردراوە و دوو مانگ و نیوی سزاکەی بۆ ناوبراو جێبەجێ دەکرێت.
ئەو هاووڵاتییە لە کاتی شەڕی نێوان ئێران و ئیسرائیل بەهۆی بڵاوکردنەوەی ستۆرییەک لەو بارەدا لە لایەن ئیدارەی ئیتلاعاتی مەریوان بانگ و هەڕەشەی لێ کرابوو کە دواتر بە دانانی بارمتە ئازاد کرابوو.
