چاوخشانیک بەسەر شەڕخوازیی رژێمی ئێران لە رۆژهەڵاتی ناوەڕاستدا!
پێشەکی
(45) ساڵە جەستەی "کۆمەڵگای مرۆڤایەتی" رووبەڕووی دیاردەیەکی شێرپەنجەیی بووەتەوە بە ناوی "ویلایەتی فەقێ". بێ گوێدانە هۆکارەکانی دەرکەوتنی ئەم دیاردەیە، سەرەڕای هەموو بانگەواز و شوێنەواری مالوێرانکارانەی ئەم دیاردەیە لە ئێران و ناوچەی رۆژهەڵاتی ناوەڕاست و جیهاندا، بەڵام ئەم دیاردەیە چەندین جار، کۆمەڵگەی مرۆڤایەتی گەیاندووەتە لێواری "مەرگ"! کە ئەگەر "هێزی بەرەنگاربوونەوە" لە بەرامبەریدا نەبوایە، دۆخەکە زۆر جیاواز دەبوو!
پرسیارەی هەنووکەیی لێرەدا ئەوەیە کە بۆچی تەمەنی ئەم دیاردەیە تا ئەمڕۆ بەردەوام بووە و بۆچی ناچارین رۆژانە شاهیدی ئەمجۆرە "مەرگانە" بین؟ هۆکار یان هۆکارەکان چ بوون و چین و پێویستە چ بکرێت؟
ئەوانەی زانیارییەکی کەمیان لەسەر زانستی پزیشکی هەیە دەزانن کە هەموو ئازارێک "چارەسەری"ی هەیە. ئازارێک کە بە "دەرمان" چار نەکرێت، پێویستە بیر لە "چارەسەر"ێکیتر بکرێتەوە. بەداخەوە کۆمەڵگەی نێودەوڵەتی "دواکەوتنێکی گەورەی" لەم بوارەدا هەیە!
دۆخی رژێمی ویلایەتی فەقێ!
بە رووخاندنی دیکتاتۆرییەتی شا لە ئێران، دیکتاتۆرییەکیتر جێی گرتەوە کە زۆر مەترسیدارتر بوو. خەڵکی ئێران بە رووخاندنی دیکتاتۆرییەتی پاشایەتی دڵخۆش بوون. سەرەتا نەیاندەزانی چ چارەنووسێکی پڕ لە ئازار، هەڕەشە لە ئێران و ناوچەکە و جیهان دەکات. لەگەڵ دامەزراندنی دیکتاتۆرییەتی ویلایەتی فەقێ لە ساڵی ١٩٧٩دا، رەهەندە مەترسیدارەکانی ئەم دیکتاتۆرییەتە خێرا دەرکەوت. ئازادییەکان کۆتایی پێهات. شەڕخوازی بوو بە "پۆششێک" بۆ سەرکوتکردنی "ئازادییەکان". ئازادیخوازی بوو بە "تاوان" و ئازادیخوازان خرانە ناو زیندان و ئەشکەنجە و "سزا" دران و جارێکیتر "دیکتاتۆرییەت" بەسەر ئێران و ئێرانییەکاندا سەپێنرا. تا ئێستا زیاتر لە (120) هەزار کەس لە لایەن ئەم دەسەڵاتەوە کۆمەڵکوژ کراون یان رادەستی تیمەکانی ئەشکەنجە و ئێعدام و تیرۆر کراون.
دیکتاتۆرییەتی ویلایەتی فەقێ!
سیمای زەقی دیکتاتۆرییەتی ویلایەتی فەقێ، خراپ بەکارهێنانی "مەزهەب" بوو. هەموو بەها مرۆییەکان ئاوێتەی "هەنگاوی فریودەرانەی ئایینی" کران. لە روانگەی هەڵگران و لایەنگرانی ئەم فیکرەوە، کۆمەڵگا لە نێوان "خودادار" و "بێخودا"دا دابەش کرا و هەر کەسێک یان رەوتێک، کە لەگەڵ ئەم دیکتاتۆرییەتدا نەگونجابێت، لە ناو "بێخوداکان"دا و لە ژێر ناونیشانی"مونافیق"، "موحارب" و "گەندەڵکاری سەر زەوی"، تووشی "سزای بەناو ئیسلامی" کران. ئەم رژێمێ بە خوێنی خەڵکی ئێران و ناوچەکە ژیاوە و لەسەر کار ماوەتەوە. ئەمەش هۆکارێکە بۆ ئەوەی گەلی ئێران زۆر جار راپەڕیوە بۆ کۆتایی هێنان بە دیکتاتۆرییەت لە وڵاتەکەیاندا. خەڵکی ئێران دیکتاتۆرییەتی (شا)یان رووخاند و ئێستا لە مەیدانی رووخاندنی دیکتاتۆرییەتی ئایینیدان! خەڵکی ئێران بە هیچ شتێک کەمتر لە رووخاندنی دیکتاتۆرییەت لە وڵاتەکەیان رازی نابن. وەلی فەقێ و هەموو بەرپرسانی ئەم رژێمێ، زیاتر لە هەموو نەیاران، لە موجاهیدینی خەلق دەترسن. چونکە هەڵگری هزرێکی بنەڕەتین دژی دیکتاتۆرییەت لە ئێراندا. ئەوان خۆیان موسڵمانن و یەکەم ئاڵاهەڵگری شەڕی دیکتاتۆرییەت بوون و لە هەمووان زیاتر خاوەن رەگ و ریشەن لە کۆمەڵگادا و بەهێزترینن!
دوو بنەمای دیکتاتۆرییەتی ویلایەتی فەقێ!
دیکتاتۆرییەت دوو بناغەی نەگۆڕی هەیە بۆ مانەوە. "سەرکوتکردن و شەڕخوازی". ئەم دەسەڵاتە لەسەر "فێڵکاری" و "دیکتاتۆرییەت" و "ویلایەتی فەقیهی" ساخ بۆتەوە. سەرکوت و شەڕخوازی هەر لە سەرەتاوە بەشێکی دانەبڕاو بووە لە سروشتی ئەم دەسەڵاتەدا. هاندانی خومەینی بۆ شەڕ لەگەڵ عێراق هاوکات بوو لەگەڵ سەرکوتکردنی ئازادییەکان لە ئێراندا. هەموو دەنگێکی ئازادیخوازی لە ئێران لە ژێر ناوی "جەنگ"دا سەرکوت دەکرا.
خامنەیی لە وتارەکەیدا لە رۆژی چوارشەممە ٤ی رەزبەری ١٤٠٣(2024)دا، پاساوی هێنایەوە بۆ شەڕەکەی رژێم لەگەڵ عێراق (کە رژێم ئەم شەڕە بە "بەرگریکردنی پیرۆز" ناو دەبات) و ئیدیعای شەڕانگێزی دووپاتکردەوە و لە کاتی قسەکردن لەگەڵ کۆمەڵێک پاسدار و هێزەکانی رژێم، وتی: “ئەم شەڕە نەک تەنها بۆ بەرگریکردن لە نیشتمان بوو، بەڵکو پرسی ئەم شەڕە لە سەرووی ئەم قسانەوە بوو. بۆ بەرگریکردن بوو لە (ڕژێم)". ناوبراو یەکسەر چووە سەر باسی شەڕی غەززە و لوبنانەوە و وتی: ئەمڕۆ رووداوێکی هاوشێوە لە لوبنان و فەلەستین رووی داوە، ئەم رووداوانەی لە لوبنان و فەلەستین روو دەدەن، وەک رووداوەکانی شەڕی سەپێنراوی هەشت ساڵە و شەڕی (بەرگریکردنی پیرۆز)ی خۆمان وایە.
نەشتەرگەری!
لە کۆنگرەیەکی رۆژنامەوانی ئەم دواییەدا، مەسعود پزیشکیان، سەرۆکی دەستنیشانکراوی وەلی فەقێ، وێڕای داننان بە قەیرانە کوشندە و چارەسەرنەکراوەکانی رژێمدا، وتی: "لەم دۆخەدا بەرەو داڕمان دەڕۆین" پاشان زیادی کرد: "ئەگەر سەرچاوەکان نەبینین و بەکارهێنان زیاد بکەین، بە دڵنیاییەوە رۆژێک لەناو دەچین". ناوبراو لە رۆژی ١٣ی خەرمانانی ساڵی ١٤٠٣ (2024) لە مەشهەد، بە روونی باسی لە پێویستی "نەشتەرگەری" کرد بە هێنانەباسی ئەگەری "مردنی نەخۆش" و وتی: لە زۆر بواردا پێویستمان بە ئەنجامدانی نەشتەرگەرییە بۆ ئەوەی بتوانین وڵات لەم دۆخە دەرباز بکەین".
هەر لەو رۆژەدا بەڕێز مەسعوود رەجەوی وتی: "پزیشکیان راست دەکات کە دەڵێت بۆ ئەوەی وڵات لەم دۆخە دەربچێت. پێویستی بە نەشتەرگەری هەیە و ئەگینا نەخۆشەکە چارەسەر وەرناگریت. بەڵام "نەشتەرگەری"ی پێویست، هەڵتەکاندن و لە ناوبردنی رژێمی ویلایەتی فەقیهیە لە رەگ و ریشەدا و بە تەواوی. هەربۆیە مامەڵەکردن لەگەڵ قەیرانەکان و بارودۆخی شۆڕشگێڕانە بە پزیشکیان ناکرێت. هەروەک چۆن شا رۆیشت، رژێمی ئاخوندیش دەبێ بڕوات و ون بێت لە بەرچاوان!".
ویلایەتی فەقێ بۆ مانەوە پێویستە بە شەڕخوازییە!
ڕژێمی ویلایەتی فەقیهی، دەرکەوتنی خۆی، بە شەڕی دژ بە عێراق دەست پێکرد.واتا ئێران هەرگیز رێککەوتننامەی ئاشتیی لەگەل عێراق واژۆ نەکرد. تەنانەت ئێستاش کە لەژێر داگیرکاریی خۆیدایە! چونکە رژێمی ویلایەتی فەقیهی بەدوای شتێکیترەوەیە. هەربۆیە لە هەر شوێنێک شەڕ هەبێت، ئەم رژێمە شوێنپێی تێدایە و خۆی لە دیوی "خراپ"ی شەڕەکەدا دادەنێت. بۆچی؟ چونکە رژێمی ئێران بە هۆی ئەو بەرخۆدانەی لە ناوخۆی ئێراندا لەدژی دەکرێت و هەیە، هەرگیز "جێگیر" نەبووە و هەرگیز "سەقامگیر" نابێت و رژێم بۆ لەسەر پێ مانەوە پێویستی بە (شەڕ) هەیە!
"شەڕی غەززە" کە یەکەمین ساڵیادی، رۆژی ٧ی ئۆکتۆبەری ٢٠٢٤ە، بەرهەمی بیرکردنەوەی ویلایەتی فەقیهە. ئەم شەڕە ناپەیوەندیدار نییە بە شەڕی ئۆکرانیاوە کە رۆژی ٢٤ی شوباتی ٢٠٢٢ دەستی پێکردووە. شوێن پەنجەی ئەم رژێمە لە شەڕی ئۆکرانیا و شەڕی غەززە بۆ هەموو لایەک روونە. هەروەک چۆن لە یەمەن، سوریا، لوبنان و عێراقیش روونە. هەربۆیە بۆ هەر شوێنێک ئەم رژێمە چووبێت، کوشتن و وێرانکاری و گەندەڵی رەگی داکوتاوە و تەشەنەی کردووە.
"نەشتەرگەری ئابووری" کە مەسعوود پزیشکیان لێرە و لەوێ ئاماژەی پێدەکات، جگە لە زۆرترین تاڵانکردن و بە بەتاڵانبردن هیچیتر نییە. ناوبراو دەیەوێت ئەوەندەی بۆی بکرێت، دەستی بخاتە گیرفانی چین و توێژە بێبەشەکانی خەڵکی ئێرانەوە بۆ قەرەبووکردنەوەی کورتهێنانی بودجە و دارایی حکومەتەکەی و دوا سەروەت و سامانی گەل بدزێت. بێ هۆ نییە لە چەند مانگی رابردوودا ئیعدام و گرانبوونی پێداویستیەکان لە زیادبووندایە!
ڕۆژی جیهانی ئاشتی!
ئەمساڵ دەستپێکی فەرمی شەڕی نێوان ئێران و عێراق هاوکات بوو لەگەڵ ٢١ی سێپتەمبەر کە "ڕۆژی نێودەوڵەتی ئاشتی"یە. ئاشتی و ئاسایشی جیهان بەبێ نەهێشتنی سەرچاوەی شەڕ مومکین نییە. ئێستا لە ئێران و ناوچەی رۆژهەڵاتی ناوەڕاستدا شەڕێک بەرپا بووە کە هۆکارە سەرەکییەکەی، رژێمی ویلایەتی فەقیهە کە لە ئێران حوکم دەکات. خامنەیی لە بارەی ئەم شەڕە هەشت ساڵەی نێوان ئێران و عێراق دەڵێت: "ئەم شەڕە دەرهاویشتە و سەمبولی هەموو ئەو ورە باشەیە کە دەتوانێت نەتەوەیەک و وڵاتێک بگەیەنێتە ئەوپەڕی رەوایەت و راستی". هەروەها وتی: "ئەم شەڕە بەڕاستی گەنجینەیەکی نەبڕاوەیە". خومەینی پێش خامنەیی، شەڕی بە "نیعمەت" و "بەرەکەت" ناو بردبوو.
حیسابێکی هەڵەی گەورەتر!
ڕژیم وای دانابوو کە بە تێوەگلانی ئەمریکا لە هەڵبژاردنەکانی وڵاتدا، فتیلەی پێشهاتە سەربازییەکان و تەنانەت سیاسییەکانیش دادەبەزێت! بەڵام تیرۆرکردنەکان و لەوانە تیرۆری (ئیسماعیل هەنیە) و (حەسەن نەسروڵڵا) خەویان لە چاوی خامنەیی زڕاند و ئێستا بە گوێرەی هەندێک میدیاکان، عەلی خامنەیی گواستراوەتەوە بۆ "شوێنێکی ئەمن"!
نۆرەی داهاتوو، کەی و کێ و لەکوێ دەبێت و چۆن دەبێت، باسەکە لەسەر مێزە و خەڵکی ئێران و ناوەندەکانی شۆڕشی سەر بە موقاومەتی ئێران دەزانن ئەرکیان چییە و دەبێ چ بکەن!
دوا وشە!
لە کاتێکدا خومەینی "ئاشتی"ی بە "ناشتنی ئیسلام" دادەنا، موجاهیدینی خەلق هەموو سەرمایەی خۆیان دانا لە پێناو کۆتاییهێنان بە شەڕ. موجاهیدین چوونە عێراق و بە واژۆکردنی (پلانی ئاشتی) لەگەڵ حکومەتی ئەوسای عێراق، لە دژی رژێم وەستانەوە و دوای ماوەیەکی کەم، ژەهری (ئاگربەست)یان بە گەرووی (خومەینی)دا ؛ڤن و رژێمیان خستە لێواری رووخاندن لە هاوینی ساڵی ١٣٦٧ (1988)دا. ئەوان بە ئاشکراکردنی پڕۆژە ئەتۆمییەکانی رژیمی ئێران، هەموو جیهانیان لە دیاردەی مەترسیداری بناژۆخوازیی ئیسلامی و ویلایەتی فەقیهی ئاگادار کردەوە. ئەوان لە دژی شەڕخوازییەکانی رژێمی ئێران لە رۆژهەڵاتی ناوەڕاست، پەنجەیان بۆ "سەری ماری ویلایەت لە تاران" راکێشا و ئەو ئادرێسەیان بە جیهان نیشان دا.
موقاومەتی ئێران ماوەی ٤٠ ساڵە جەخت لەوە دەکاتەوە کە سەری ماری شەڕخوازی و شەڕفرۆشی و تیرۆر و ناوەندی بناژۆخوازی ئیسلامی (رژێمی ئێران)ە. پێشهاتەکانی رۆژانی رابردوو ئەم راستییەیان بۆ هەموو لایەک سەلماند. بەڕێز مەسعوود رەجەوی لە دوا پەیامی خۆیدا رایگەیاند: "چارەنووسی حەسەن نەسروڵڵا سەلماندی کە خامنەیی دۆڕاوی ستراتیژیکیی تیرۆر و شەڕخوازییە". هەر لە یەکەم رۆژەوە گوتمان، ئەمە ئەو شەڕەیە کە داوێنی رژێمیش دەگرێتەوە. پێویستە سەری مارەکە بکرێتە ئامانج و سەری خامنەیی بە با بدرێت.
***
