هێرشی نوێی دوژمن: نەك بە چەك، بە فۆڵۆوەر و پۆست و پڕۆپاگەندە!
لە سەردەمێکدا کە هەموو کەسێک بە مۆبایلێکی زیرەکەوە بانگەشەی “ڕۆژنامەگەری” دەکات، سیاسەتی دابەشکاری لە ژێر ئاڵای “مافی کورد” و “ئازادی ڕادەربڕین”دا خۆی حەشار داوەو، کوردستان لێک دەکاتە دووژمن. کێ لە پشت ئەم شەپۆلە ڕێکخراوەی درۆ و دەنگۆ و قسەی ڕقاوییە ئاژاوەگێرانەیە و بۆچی؟
کورد لە ئێستادا زیاتر لە هەمیشە لەگەڵ خۆی ناکۆکی هەیە. نەک لە چیای قەندیل، نەک لە کوچە و کۆڵانەکانی ماکۆ و ئیلام و سلێمانی و هەولێر و دیاربەکر، بەڵکو لە پەیجەکانی ئینستاگرام و کەناڵەکانی تێلێگرام و ژووری کلابهاوس و تەنانەت کاناڵە ئاسمانیەکانیش . شەڕی ڕاستەقینە چیتر بە فیشەک نییە؛ لەگەڵ پۆست، چیرۆک، پەخشی ڕاستەوخۆ و "شوێنی شاشە"دایە. دەنگۆیەکی ناراست و ساختە بەس ۆ ئەوەی خۆیان بە وڵاتپارێز و نەتەوەیی دەربخەن، بەسە بۆ بڵاوبوونەوە و لە ماوەی کەمتر لە چەند کاتژمێرێکدا هەزاران کورد ئامادەن سوکایەتی و هەڕەشەن تەنانەت لە برا و هاوڕێی و هاوکار و جیرانەکانیان.
ئەمە تەنها شەپۆلێکی خۆبەخۆی توڕەیی نییە. پڕۆژەیەکی تەواوەتییە.
لاپەڕەی بێناو بە دەیان هەزار فۆڵۆوەرەوە کە هیچ ناونیشان و بەرپرسیارێتییەکیان نییە و تەنانەت پەیرە و پرۆگرامێکی ڕۆژنامەنووسیان نییە؛ ڕۆژێک بە حیزبێک بە تیرۆریست و ڕۆژی دواتر لایەنێکە بە خیانەتکار ناودەبەن. هەر ئەم لاپەڕانە بەتەواوی هەمان هێڵ پێشدەخەن کە دوژمنانی یەکگرتوویی کورد لە هەڵبژاردنەکان، لە ناڕەزایەتییەکانی ڕۆژهەڵات، لە دانوستانەکانی حیزب و رێکخراوەیەکان و تەنانەت لە بابەتی سادەی دانانی پارێزگاریشدا دەیانەوێت ئاژاوەگێری و پڕوپاگەندەی درۆ بڵاودەکەنەوە.
ژوورەکانی کلابهاوس کە لەژێر ناونیشانی “گفتوگۆی سیاسی ئازادی کوردی” دەکرێتەوە، بەڵام بە کردەوە دەگۆڕێت بۆ دادگای مەیدانی؛ لە کوێدا، بەبێ بەڵگە، بەبێ ئەگەری بەرگریکردن، و بەبێ هیچ بەرپرسیارێتییەکی یاسایی، ناوبانگی تاک و لایەنەکان لەکەدار بێت. ئەوەی جێگای سەرنجە زۆربەی بەڕێوەبەرانی ئەم ژوورانە یان ناسنامەی ڕاستەقینەی نادیاریان هەیە یان مێژوویەکی ڕوونی چالاکیی سیاسی و مەدەنییان نییە، بەڵام بڕێکی باوەڕپێنەکراو لە بودجە و کات و وزە بۆ ئەم کارە خەرج دەکەن.
شەپۆلی نوێی بە نێوی ڕۆژنامەنووس کە نە ڕاهێنراون، نە ئەخلاقی میدیایی دەزانن، تەنانەت زمانی کوردیەکەش بە دروستی نانووسن، بەڵام ڕۆژانە مانشێتی ئاگرین دەنووسن: پارتەکان بە هاوکاریی دوژمنان ناوزەد دەکەن. پرسیاری سەرەکی ئەوەیە: ئەم هەموو هەماهەنگییە، ئەم هەموو بودجەیە بۆ ڕیکلام و کڕینی فۆڵۆوەر و بەرزکردنەوەی پۆست و دروستکردنی چەندین لاپەڕەی پیشەیی بە گرافیکی یەکسان و یەک فۆنت، لە کوێوە سەرچاوە دەگرێت؟
دەزگای هەواڵگریی وڵاتانی داگیرکەر (تورکیا، ئێران، عێراق، سوریا) کە ساڵانێکە تێگەیشتوون کوشتنی کوردێک بە فیشەک گرانتر دەکەوێت بۆیان، بەڵام ناکۆکی و دوبەرەکی لە ناو ماڵی کورد لە دژی یەکترهەرزانتر و بێ کاریگەری و تەنانەت پێویست ناکات وەک کردەوەی تیرۆریستی وڵام دەرەو دسەلاتەکەشیان بخەنە ژێر برسیار.
هەندێک ڕەوتی سیاسی ناوخۆیی کە لەبری کێبڕکێی تەندروست، پێیان باشترە لە ڕێگەی تیرۆرکردنی کەسایەتی و دەنگۆی ناڕاست، رەقیبی سیاسیەکەیان لە گۆڕەپانەکەداوە پاک و پەراوێز بخرێت ئەمانە بە ڕواڵەت خۆیان بە "لایەنگری مافی کورد پێناسە دەکەن"، بەڵام بە کردەوە، بە پارە و میدیا، پڕۆژەی "کوردی باش بەرامبەر کوردی خراپ" پێش دەخەن بۆ ئەوەی هەرگیز یەک دەنگی کوردی بەهێز دروست نەبێت.
ئێمە ئێستا لە مەترسیدارترین قۆناغی مێژووی هاوچەرخمانداین: قۆناغێک کە چیتر دوژمن پێویستی بە هێرشی سەربازی نییە؛ تەنها پێویستە چەند پەیجێکی ئینستاگرام رێک بخات و چەند ژووری کلابهاوس دابنێت و چاوەڕێی ئەوە بکات یەکتربشکێنین.
ئەگەر ئەمڕۆ ئەم شەپۆلە درۆ و دووبەرەکییە ڕانەگرین، سبەی نە حزب و سەرکردە و ئیعتبار و تەنانەت متمانەمان بە یەکتریش نابێت. لەو ڕۆژەدا دوژمن تەنانەت خۆی بە سەرکەوتنەوە سەرقاڵ ناکات؛ چونکە ئێمە خۆمان کارەکەمان تەواو کردووە.
با یەکجار و بۆ هەمیشە بپرسین: ئەو پەیجەی ڕۆژانە کورد خراپتر دەکات، بەڕاستی بۆ کام کورد کار دەکات؟
وە با لە ئەمڕۆوە بەڵێن بدەین: پێش ناردن، پێش ئەوەی کۆمێنتێک بەجێبهێڵین، پێش ئەوەی بەشداری لە ژوورە گوماناویەکاندا بکەین، با جارێک بپرسین: "ئایا ئەمە یارمەتیدەرە بۆ یەکگرتن یان دابەشبوونمان؟"
چونکە کوردستانی ڕاستەقینە لە چیرۆکی ساختەدا بنیات نانرێت، بەڵکو لە یەکڕیزی و عەقڵانییەتی نەتەوەیی ئێمەدا بنیات دەنرێت.
چارەسەرەکان بۆ مامەڵەکردن لەگەڵ دابەشبوونی مەجازی چارەسەری پراکتیکی و دەستبەجێ بۆ مامەڵەکردن لەگەڵ دابەشبوونی مەجازی لە فەزای کوردیدا
بەکارهێنەرانی تۆری کۆمەڵایەتی وەرن با پێکەوە ئەم ڕاهێنانە بکەین
یاسای ٣ چرکەی بۆ خۆمان دیاری بکەین پێش کاردانەوە لایک و کۆمێنت و ستوری و پۆست کردن و ناردی بۆ هاورێکانمان: لەخۆت بپرسە "ئایا ئەم پۆستە کاریگەری لە یەکڕیزی یان دابەشبوونی ناو ماڵی کورد؟
هەر پەیج/کەناڵێک کە ناسنامەی ڕاستەقینەی نادیارە، ئانفاڵۆو و ڕیپۆرتی کەن.
پێش پەخشکردنی هەر "بەڵگەنامەیەک" یان "ئاشکراکردنێک"، لانیکەم لە دوو سەرچاوەی متمانەپێکراو و ناسراوەوە پشتڕاستکردنەوە وەربگرە.
لە ژوورەکانی کلابهاوس یا لایڤەکانی ئەنستاگرام تەنها گوێ لە ئەوانە بگرن کە ناسنامەی ڕاستەقینەیان ناسراوە و مێژوویەکی ڕوونی چالاکییەکانیان هەیە.
لەبری جنێودان و تۆمەت، بلۆک و بێدەنگ بەکاربهێنە؛ وزەت بەفیڕۆ مەدە لە بڵاوکردنەوەی ڕق و کینە.
یاسایەکی سادە لە گروپەکانی خێزان و هاوڕێیانی واتسئەپ/تەلەگرام دابنێ: "هەواڵی سیاسی بەبێ سەرچاوەی باوەڕپێکراو = سڕینەوەی دەستبەجێی نامە و ئاگادارکردنەوە."
دروستکردنی "ئەنجومەنێکی هاوبەشی پشتڕاستکردنەوەی میدیای کوردستان" لەگەڵ نوێنەری سەرجەم لایەنەکان یا دەستەی ڕاگەیاندن و ڕۆژنامەنووسی هەرێمی کوردستان (MICT) کە ئەم دامەزراوەیە دەسەڵاتی سەرەکی فەرمییە بۆ چاودێریکردنی میدیا کە دەبێت:
چاودێریکردنی میدیا و ڕۆژنامەنوسان
پێداچوونەوە بە سکاڵاکانی کەسان و دامەزراوەکان
لێکۆڵینەوە لە بڵاوکردنەوەی هەواڵی ناڕاست و ناوزڕاندن و پێشێلکردنی بنەما پیشەییەکان
سەپاندنی غەرامە یان داخستنی دەزگاکانی ڕاگەیاندن لە ئەگەری سەرپێچی
کۆمەڵگەی مەدەنی و ئاستی ڕۆشنبیران
هەڵمەتێک دەستپێبکەن #من_کوردستانم_ بە ڕوونکردنەوەیەکی لۆژیکی وەڵام بدەینەوە بۆ هەرکەسێک پۆستێکی دووبەرەکی بڵاودەکاتەوە.
