لە شاری دەماوەندی ئێران چالاكوانێكی كرێكاریی ڕۆژهەڵاتی كوردستان دەستبەسەر كراوە و ١١ كەسی دیكەش لێكۆڵینەوەیان لێ كراوە.
چالاکوانی کرێکاریی " فەرزاد ڕۆستەمی " خەڵکی گوندی " ئەوێهەنگی" سەر بە شاری سنە و دانیشتووی دەماوەند، لەلایەن هێزەکانی ڕژیم دەستبەسەر كرا و بۆ شوێنێکی نادیار گواستراوەتەوە.
بەپێی ڕاپۆرتی كۆڵبەرنیوز، هێزەکانی ڕژیم هاوکات یازدە چالاکوانی کرێکاریی کوردی دانیشتووی دەماوەندیان بانگهێشت كردووە و لێپرسینەوەیان لێ كردوون، ئەو چالاكوانانە بریتین لە ؛ مەهدی قاسمی، لوقمان قاسمی، شاهۆ قاسمی، فەرزین ڕۆستەمی، بێهزاد ڕۆستەمی، شاپوور حەبیبی، جەلال محەممەدی، جەمیل سفیدی، سەیوان قاسمی، فەرشاد مەلەکی دوخت و ئیقباڵ مورادی.
هێزەکانی ڕژیم پاش کۆتاییهاتنی لێپرسینەوەی ئەم چالاکانە دەستیان بەسەر تەلەفۆنی ئەم یازدە هاووڵاتییەدا گرتووە و ئازادیان كردوون.
بە گوتەی سەرچاوەکانی نزیک لەم هاووڵاتییانە، فشارەکانی دژی ئەم کرێکارانە بەهۆی بەشداری لە ڕێوڕەسمەکانی یەکی مانگی مەی ڕۆژی جیهانیی کرێکار بووە.
